Novel Kumang Sadok

Inilah novel terbaru keluaran Borneo Media Solutions.

Penulis: Kerapa Mali

Harga: RM20.00

Tibak Cherita / Sinopsis

Endu Berinjan nadai mayuh jaku digaga Raja Berani baka nya. Nganu enda, ngau pan enda. Gaga pungka! Singin asai ati iya ka manjung gaga betaban lari enggau orang Raja Berani. Berasai temegah keba laban ukai orang sengapa ti ngema. Manuk sabung apai iya ti endang udah dipaduka jadi enggau iya nyau dikesaika iya ari puak ati. Manuk sabung apai iya nya empai tau diambi nyadika laki, enda tealahka pemerani orang ke benung nabanka iya lari.

Taja baka nya, Berinjan, kedua bali nama Berenggang, bisi nyimpan pengirau dalam tungkul ati, "Iya kati ku bini nuan Sawai meda aku datai din lagi dih ambai?" Ku Berenggang, maya seduai dalam pejalai nuju rumah sida Libau empu.

"Eh! Anang nuan irau tajau asi, nemu aku ngatur semua nya. Keba aku datai ngambi nuan laban aku sanggup ngesan, ukai semina nemu nebang!"

Dalam ati iya berasai ringat begerami sinu. Sinu ninggalka bukit Sadok ti ngelama tu udah ngangkatka nama sereta rita iya ngerembai ke serata dunya, sangkai ba Tanah Malaya, ngelekai ba dunya India udah nya ngerembai ke Afrika. Dikemesaika ba tanah Airupa. Beberita ketegal kih sereta chakah ngelaban perintah ti seruran nubai runding bansa Iban. Pugu iya, perintah ti nyabung Iban bela Iban begedika pangan diri lalu bekayau.

Nelusur ai mata Rentap meda kepul asap enggau jelar api makai perabung rumah enggau kuta sida. Ari iya ke bediri dia, bekesetak dinga api mau makai rumah sida. Dalam ati Rentap mega api ngungut, bekesetup ngumpa darah kayau iya ti tetap deka bebalas taja ukai ba serak tubuh iya. Biar pengering enggau pengeliat ati iya nya nyadika semengat, nyadi chuan enggau teladan peturun Iban ke dudi-dudi jemah ila. Awakka Iban seati ngelaban orang ti menyati bansa Iban, enggaika kitai Iban nyau nyadi kampar ba menua diri empu.